બોટાદ જિલ્લામાં લાંબા સમયથી જિલ્લા જેલની અછત હતી. આ જરૂરિયાત પૂરી કરવા શહેરના અળવ રોડ પર આધુનિક સુવિધાઓથી સજ્જ જિલ્લા જેલનું નિર્માણ કાર્ય પ્રગતિમાં છે. અંદાજે 50 કરોડ રૂપિયાના ખર્ચે બની રહેલી આ જેલનું લગભગ 70 ટકા કામ પૂર્ણ થઈ ગયું છે.
બોટાદના ધારાસભ્ય ઉમેશ મકવાણાએ નિર્માણાધીન જિલ્લા જેલની મુલાકાત લીધી હતી. તેમણે જેલના નિર્માણ કાર્ય અને તેની કામગીરીની સમીક્ષા કરી. ધારાસભ્યએ જણાવ્યું કે આ જિલ્લા કક્ષાની જેલ અત્યાધુનિક સુવિધાઓથી સજ્જ હશે.આ જેલમાં કેદીઓ માટે લાઈબ્રેરી, દવાખાના અને રોજગારીલક્ષી વિવિધ વ્યવસ્થાઓ કરાઈ રહી છે.
જેલમાં 38થી વધુ કેદીઓને સમાવવાની ક્ષમતા હશે. મહિલા કેદીઓ માટે અલગ બેરેક, ઘોડિયા ઘર અને આંગણવાડી જેવી સુવિધાઓ પણ ઉપલબ્ધ કરાશે.
ધારાસભ્ય ઉમેશ મકવાણાએ વધુમાં જણાવ્યું કે, 50 કરોડ રૂપિયાથી વધુના ખર્ચે બની રહેલી આ જિલ્લા જેલ 2026 સુધીમાં સંપૂર્ણપણે કાર્યરત થઈ જશે. આ જેલ શરૂ થવાથી બોટાદ જિલ્લાના કેદીઓને આધુનિક અને સુવિધાજનક વ્યવસ્થા મળશે.
