બોટાદ જિલ્લાના રાણપુરના કિનારા ચોકડી પાસે
એક હૃદયદ્રાવક અકસ્માતની ઘટના સામે આવી છે. પુરપાટ ઝડપે આવી રહેલી ટ્રક અને ઈકો કાર વચ્ચે સર્જાયેલા જોરદાર અકસ્માતમાં 3 વ્યક્તિઓના ઘટનાસ્થળે જ કરુણ મોત નિપજ્યા છે, જ્યારે અન્ય 4 લોકોને ગંભીર ઈજાઓ પહોંચતા તેમને તાત્કાલિક સારવાર માટે હોસ્પિટલ ખસેડવામાં આવ્યા છે.
પ્રાપ્ત પ્રાથમિક માહિતી અનુસાર, ઈકો ગાડી (નંબર: MP 09 DK 4398) મધ્યપ્રદેશના પનાલા ગામથી રાણપુરના કુંડળી ગામે ખેતીવાડીના મજૂરી કામ અર્થે આવી રહી હતી. આ દરમિયાન કિનારા ચોકડી પાસે ટ્રક સાથે કારનો ગંભીર અકસ્માત સર્જાયો હતો. અકસ્માત એટલો ભયાનક હતો કે ઈકો ગાડીનો કચ્ચરઘાણ નીકળી ગયો હતો.
ઘટનાની જાણ થતા જ રાણપુર મામલતદાર અને પોલીસનો કાફલો તાત્કાલિક ઘટનાસ્થળે દોડી ગયો હતો. પોલીસે મૃતદેહોને પીએમ અર્થે ખસેડીને આગળની તપાસ હાથ ધરી છે. ઈજાગ્રસ્તોની હાલત ગંભીર હોવાનું જાણવા મળી રહ્યું છે, જેમને વધુ સારવાર માટે નજીકની મોટી હોસ્પિટલમાં રિફર કરવામાં આવ્યા છે.આ ઘટનાને પગલે સ્થાનિક પંથકમાં અરેરાટી વ્યાપી ગઈ છે અને મજૂર પરિવારમાં માતમનો માહોલ જોવા મળી રહ્યો છે.
