બોટાદ જિલ્લાના બરવાળા પોલીસે નાવડા રોડ પરથી એક ઇકો કારમાંથી ભારતીય બનાવટના વિદેશી બીયરનો જથ્થો ઝડપી પાડ્યો છે. પોલીસે ₹2.05 લાખના કુલ મુદ્દામાલ સાથે એક આરોપીની ધરપકડ કરી કાયદેસરની કાર્યવાહી હાથ ધરી છે.ભાવનગર રેન્જ પોલીસ મહાનિરીક્ષક આર.વી. અસારી અને બોટાદ જિલ્લા પોલીસ અધિક્ષક ધર્મેન્દ્ર શર્માની સૂચના હેઠળ જિલ્લામાં દારૂ અને જુગારની પ્રવૃત્તિઓ નાબૂદ કરવા ઝુંબેશ ચલાવવામાં આવી રહી છે. આ અંતર્ગત, બરવાળા પોલીસ સ્ટેશનના પી.આઈ. એન.વી. વસાવા અને સ્ટાફ પેટ્રોલિંગમાં હતા ત્યારે તેમને ચોક્કસ બાતમી મળી હતી.બાતમી મુજબ, GJ-01-KP-5021 નંબરની એક ઇકો ગાડી ભારતીય બનાવટના વિદેશી દારૂનો જથ્થો ભરીને બરવાળા તરફ આવવાની હતી. આ માહિતીના આધારે, પોલીસે બરવાળા ગામ નજીક નાવડા રોડ પર વોચ ગોઠવી હતી અને શંકાસ્પદ ગાડીને પકડી પાડી હતી.કારની તલાશી લેતા તેમાંથી માઉન્ટસ 6000 ઓરિજનલ સુપર સ્ટ્રોંગ બીયરની 36 બોટલો મળી આવી હતી, જેની કિંમત ₹5,400 છે. આ ઉપરાંત, ₹2,00,000 ની કિંમતની મારૂતિ સુઝુકી ઇકો ગાડી પણ જપ્ત કરવામાં આવી હતી. આમ, પોલીસે કુલ ₹2,05,400 નો મુદ્દામાલ જપ્ત કર્યો હતો.આ કામગીરીમાં બરવાળા પોલીસ સ્ટેશનના પી.આઈ. એન.વી. વસાવા, એ.એસ.આઈ. વિજયસિંહ ભરતસિંહ, પોલીસ કોન્સ્ટેબલ પ્રકાશભાઈ મોતિલાલ, સિદ્ધરાજસિંહ લાલાભાઈ, હસમુખસિંહ શિવરાજસિંહ, અજીતસિંહ પ્રહલાદસિંહ અને યશપાલસિંહ જગદીશસિંહ સહિતનો સ્ટાફ જોડાયો હતો.
