રંગપર ગામની સ્થાનિક સરકારી શાળામાં શિક્ષણના મહાપર્વ સમાન “શાળા પ્રવેશોત્સવ” કાર્યક્રમની ભવ્ય અને ઉત્સાહભેર ઉજવણી કરવામાં આવી હતી.
આ પ્રસંગે શાળાના આંગણે ભૂલકાઓને આવકારવા માટે ગામના આગેવાનો અને વહીવટી પદાધિકારીઓ મોટી સંખ્યામાં ઉપસ્થિત રહ્યા હતા.
આ કાર્યક્રમમાં મુખ્ય અતિથિ વિશેષ તરીકે જીલ્લા પંચાયતના પ્રમુખ પાયલબેન મથોલીયા ખાસ ઉપસ્થિત રહ્યા હતા. તેમણે દીપ પ્રાગટ્ય કરીને કાર્યક્રમને ખુલ્લો મૂક્યો હતો અને પ્રથમ વખત શાળામાં પગ મૂકતા ભૂલકાઓને કુમકુમ તિલક કરી, મોં મીઠું કરાવીને શૈક્ષણિક કીટ આપી આવકાર્યા હતા.
પાયલબેને પોતાના ઉદ્બોધનમાં દીકરીઓના શિક્ષણ પર ભાર મૂક્યો હતો અને ગામના દરેક બાળકને ગુણવત્તાસભર શિક્ષણ મળે તે માટે વાલીઓને પણ જાગૃત રહેવા અપીલ કરી હતી.
આ પ્રસંગે જીલ્લા પંચાયતના સદસ્ય દેવજીભાઈ પણ ખાસ હાજર રહ્યા હતા અને તેમણે બાળકોને પ્રોત્સાહિત કરતા જણાવ્યું હતું કે, શિક્ષણ એ જ પ્રગતિની ચાવી છે.કાર્યક્રમ દરમિયાન ગામના સરપંચ,એસ.એમ.સી. ના સભ્યો તેમજ ગામના અગ્રણીઓ અને આગેવાનો એ હાજર રહીને શાળાના સ્ટાફ અને બાળકોનો ઉત્સાહ વધાર્યો હતો.
ગ્રામજનોએ પણ આ ઉત્સવને દિવાળીની જેમ ઉજવ્યો હતો. સમગ્ર કાર્યક્રમને સફળ બનાવવા માટે શાળાના આચાર્ય અને શિક્ષકગણે ભારે જહેમત ઉઠાવી હતી. કાર્યક્રમના અંતે ઉપસ્થિત તમામ મહાનુભાવોનો આભાર વ્યક્ત કરવામાં આવ્યો હતો.
