શાળા સલામતી સપ્તાહની ઉજવણી અંતર્ગત ગઢડા તાલુકાની ભંડારિયા પ્રાથમિક શાળામાં વિદ્યાર્થીઓ માટે ફર્સ્ટ એડ તથા પ્રાથમિક સારવાર અને CPR (કાર્ડિયોપલ્મોનરી રિસસિટેશન) અંગે માહિતીસભર કાર્યક્રમનું આયોજન કરવામાં આવ્યું હતું.
આ કાર્યક્રમનો મુખ્ય હેતુ બાળકોમાં આપત્તિ કે અચાનક અકસ્માત સમયે કેવી રીતે તરત અને યોગ્ય રીતે પ્રાથમિક સારવાર આપી શકાય તેની સમજ વિકસાવવાનો હતો, જેથી તેઓ સ્વયં તેમજ અન્યને મદદરૂપ બની શકે. આ કાર્યક્રમમાં આરોગ્ય વિભાગ, તાલુકા હેલ્થ ઓફિસ, ગઢડા દ્વારા સક્રિય સહયોગ આપવામાં આવ્યો હતો.
RBSK અંતર્ગત કાર્યરત ડૉ. મૌલિક વઢેલ દ્વારા વિદ્યાર્થીઓને સરળ ભાષામાં ફર્સ્ટ એડના મૂળભૂત સિદ્ધાંતો, ઈજા થાય ત્યારે કરવાના પ્રથમ પગલાં, બેહોશ વ્યક્તિને કેવી રીતે સંભાળવી તેમજ CPR આપવાની યોગ્ય પદ્ધતિ વિશે વ્યવહારુ માર્ગદર્શન આપવામાં આવ્યું હતું. વિદ્યાર્થીઓએ આ તમામ માહિતી રસપૂર્વક સાંભળી અને પ્રદર્શન દ્વારા તેને સમજી.
કાર્યક્રમ દરમિયાન બાળકોને સમજાવવામાં આવ્યું હતું કે શાળા, ઘર અથવા જાહેર સ્થળે કોઈ ઈમરજન્સીની પરિસ્થિતિ ઊભી થાય ત્યારે ઘભરાયા વગર શાંતિથી કેવી રીતે પગલાં લેવા તે અત્યંત મહત્વનું છે. આવા કાર્યક્રમો બાળકોમાં આત્મવિશ્વાસ, જવાબદારી અને માનવતાની ભાવના વિકસાવવામાં મહત્વપૂર્ણ ભૂમિકા ભજવે છે. આ રીતે શાળા સલામતી સપ્તાહ અંતર્ગત યોજાયેલ આ આરોગ્ય જાગૃતિ કાર્યક્રમ વિદ્યાર્થીઓ માટે ઉપયોગી અને પ્રેરણાદાયક સાબિત થયો હતો તથા ભવિષ્યમાં સલામત અને સતર્ક નાગરિક ઘડવામાં સહાયક બનશે.
