બોટાદ જિલ્લાનાં હડદડ ગામ ખાતે આવેલ આંગણવાડી કેન્દ્રની કલેક્ટર ડો. જીન્સી રોય તથા અધિક નિવાસી કલેક્ટર પી. એલ. ઝણકાત દ્વારા મુલાકાત લેવામાં આવી હતી. મુલાકાત દરમિયાન આંગણવાડી કેન્દ્ર ખાતે ચાલી રહેલી સેવાઓ, બાળકોનાં પોષણ, સ્વચ્છતા વ્યવસ્થા તથા શિક્ષણલક્ષી પ્રવૃત્તિઓની વિગતવાર સમીક્ષા કરવામાં આવી હતી.
કલેક્ટરએ આંગણવાડી કેન્દ્રમાં બાળકોને મળતાં પોષણયુક્ત આહાર, હાજરી નોંધણી, રેકોર્ડ સંભાળ તેમજ માતા અને બાળ કલ્યાણ યોજનાઓના અમલ અંગે જરૂરી સૂચનાઓ આપી હતી. ઉપરાંત, કેન્દ્રની સ્વચ્છતા, સુવિધાઓ તથા બાળમિત્ર વાતાવરણ વધુ સશક્ત બનાવવા માર્ગદર્શન આપવામાં આવ્યું હતું.
અધિક નિવાસી કલેક્ટરએ આંગણવાડી કાર્યકર્તા અને સહાયકાઓને સરકારની વિવિધ કલ્યાણકારી યોજનાઓનું અસરકારક અમલીકરણ કરવા તેમજ લાભાર્થીઓ સુધી યોગ્ય રીતે પહોંચાડવા માટે સૂચના આપી હતી. આ મુલાકાતથી આંગણવાડી કેન્દ્રની કામગીરીને વધુ સુદ્રઢ બનાવવાની દિશામાં મહત્વપૂર્ણ માર્ગદર્શન મળ્યું.
