લીંબડી તાલુકામાં તાજેતરમાં થયેલા કમોસમી વરસાદ અને વાવાઝોડાએ ખેડૂતોની કમર તોડી નાખી છે. કુદરતી આફતના કારણે ખેતી પાકને થયેલા વ્યાપક નુકશાનના મુદ્દે આજે લીંબડી તાલુકા કોંગ્રેસ સમિતિ દ્વારા આક્રમક વલણ અપનાવી લીંબડી સેવાસદન ખાતે આવેદનપત્ર પાઠવવામાં આવ્યું હતું. કોંગ્રેસના આગેવાનોએ સરકાર પાસે ખેડૂતોને તાત્કાલિક યોગ્ય વળતર ચૂકવવાની માંગ કરી છે.
ચાલુ વર્ષે ખેડૂતોએ રાત-દિવસ મહેનત કરીને રવિ પાક તૈયાર કર્યો હતો, પરંતુ અચાનક બદલાયેલા વાતાવરણ અને ભારે પવન સાથેના વરસાદે ખેડૂતોના મોઢે આવેલો કોળિયો છીનવી લીધો છે. આવેદનપત્રમાં જણાવ્યા અનુસાર, મુખ્યત્વે નીચેના પાકોને ભારે નુકશાન પહોંચ્યું છે:જીરું અને ધાણા: પવન અને વરસાદથી પાક કાળો પડી ગયો છે અથવા ખરી પડ્યો છે.ઘઉં અને રાયડો: તૈયાર પાક જમીનદોસ્ત થઈ જતાં લણણીમાં મુશ્કેલી ઉભી થઈ છે.વરિયાળી: વાવાઝોડાના કારણે વરિયાળીના પાકને પણ મોટું નુકશાન થયું છે.તાત્કાલિક સર્વે અને રાહત પેકેજની માંગલીંબડી તાલુકા કોંગ્રેસ સમિતિએ રજૂઆત કરતા જણાવ્યું હતું કે, ખેડૂતોએ મોંઘા બિયારણ અને ખાતરનો ઉપયોગ કરીને ખેતી કરી હતી, હવે તેમની પાસે આગામી સીઝન માટે પણ મૂડી બચી નથી. કોંગ્રેસે સરકાર પાસે મુખ્ય બે માંગણીઓ કરી છે:લીંબડી તાલુકાના તમામ અસરગ્રસ્ત ગામોમાં યુદ્ધના ધોરણે સર્વે કરવામાં આવે.સર્વેના આધારે ખેડૂતો માટે વહેલી તકે ખાસ રાહત પેકેજ જાહેર કરવામાં આવે.આ પ્રસંગે તાલુકા કોંગ્રેસના હોદ્દેદારો અને મોટી સંખ્યામાં ખેડૂતો ઉપસ્થિત રહ્યા હતા. જો સરકાર દ્વારા વહેલી તકે યોગ્ય પગલાં લેવામાં નહીં આવે, તો આગામી સમયમાં ઉગ્ર આંદોલન કરવાની ચીમકી પણ આપવામાં આવી છે.
