નારી શક્તિ રાષ્ટ્ર શક્તિ’ અભિયાન અંતર્ગત બોટાદ જિલ્લાના તુરખા ગામે પટેલ સમાજની વાડી ખાતે મહિલા સુરક્ષા અને સશક્તિકરણ અંગે વિશેષ જાગૃતિ કાર્યક્રમનું આયોજન કરવામાં આવ્યું હતું. આ કાર્યક્રમ ઉમિયા મહિલા આર્ટ્સ એન્ડ કોમર્સ કોલેજ, લાઠીદડ દ્વારા આયોજિત એન.એન.એસ. કેમ્પ અંતર્ગત યોજાયો હતો.
બોટાદ જિલ્લા પોલીસ અધિક્ષક ધર્મેન્દ્ર શર્મા તથા બોટાદ જિલ્લા મહિલા અને બાળ અધિકારી આઈ. આઈ. મન્સૂરીના માર્ગદર્શન હેઠળ ‘બેટી બચાઓ, બેટી પઢાઓ’ અભિયાન અનુસંધાને કોલેજની વિદ્યાર્થીનીઓને વિવિધ કાયદાકીય તેમજ યોજનાકીય માર્ગદર્શન આપવામાં આવ્યું હતું.
કાર્યક્રમ દરમિયાન પીબીએસસી કાઉન્સેલર શ્રીમતી રીના વ્યાસ દ્વારા સોશિયલ મીડિયા દ્વારા થતાં લાભ-ગેરલાભ, એકાઉન્ટ પ્રાઇવેસી, AIના ઉપયોગ તેમજ યુવતીઓ સાથે થતી પજવણી કે હેરાનગતિ સમયે ક્યાં અને કેવી રીતે મદદ મેળવી શકાય તે અંગે વિસ્તૃત ચર્ચા કરવામાં આવી હતી. સાથે જ ઘરેલું હિંસા અંગે મહિલાઓને મળતી સહાય અને માર્ગદર્શન વિશે પણ માહિતી આપવામાં આવી હતી.
શી ટીમ મહિલા પોલીસ સ્ટેશન તરફથી સુરપાલસિંહ ગોહિલ દ્વારા શી ટીમની કામગીરી તેમજ સાયબર ફ્રોડથી બચવાના ઉપાયો અંગે ઉપયોગી માહિતી આપવામાં આવી હતી. 181 મહિલા હેલ્પલાઇન અને તેની એપ્લિકેશન વિશે જલ્પાબેન તથા કોન્સ્ટેબલ લતાબેન દ્વારા સરળ ભાષામાં સમજ આપવામાં આવી હતી. સખી વન સ્ટોપ સેન્ટરની કામગીરી તથા જિલ્લા મહિલા અને બાળ અધિકારીની કચેરી દ્વારા ચાલતી વિવિધ યોજનાઓ અંગે જવનીકાબેન પટેલ દ્વારા વિગતવાર માહિતી આપવામાં આવી હતી.
આ કાર્યક્રમમાં તુરખા ગામની મહિલાઓ સાથે સાથે પુરુષો પણ મોટી સંખ્યામાં ઉપસ્થિત રહ્યાં હતાં અને કાર્યક્રમને ઉત્સાહપૂર્વક સહભાગી બનાવી સફળ બનાવ્યો હતો. વિવિધ કાયદાકીય તથા યોજનાકીય માહિતીને કારણે સમગ્ર કાર્યક્રમ ખૂબ જ રસસભર અને ઉપયોગી સાબિત થયો હતો. આ કાયદાકીય જાગૃતિ શિબિરને ઉમિયા મહિલા આર્ટ્સ એન્ડ કોમર્સ કોલેજના આચાર્ય શ્રીમતી સેજલબેનના માર્ગદર્શન હેઠળ અધ્યાપિકા તૃપ્તિબેન, દીપિકાબેન, જીનલબેન તથા મોનીકાબેનના સંકલનથી સફળતાપૂર્વક પૂર્ણ કરવામાં આવ્યો હતો.
