અખિલ ભારતીય કોળી સમાજના રાષ્ટ્રીય ઉપાધ્યક્ષ પ્રવિણ કોળીએ બગદાણાના નવનીત બાલધીયા દ્વારા વાયરલ કરાયેલા વીડિયો અંગે સ્પષ્ટતા કરી છે. આ વીડિયોમાં હિરાભાઈ સોલંકી અને કુંવરજી બાવળીયાનો ઉલ્લેખ થતા, કોળી સમાજમાં વિભાજનના પ્રયાસો થઈ રહ્યા હોવાના આક્ષેપો ઉઠ્યા હતા.
પ્રવિણ કોળીએ જણાવ્યું કે, નવનીત બાલધીયા કોંગ્રેસમાં જોડાયા બાદ છેલ્લા બે-ત્રણ દિવસથી કોળી સમાજમાં આંતરિક વિભાજન કરવાના પ્રયાસો ચાલી રહ્યા છે.
તેમણે સ્પષ્ટતા કરી કે નવનીત બાલધીયાના કોંગ્રેસમાં જોડાવાથી કોળી સમાજને કે હિરાભાઈ સોલંકી અને પરસોતમભાઈને કોઈ તકલીફ નથી.
પ્રવિણ કોળીએ હિરાભાઈ સોલંકીના નેતૃત્વની પ્રશંસા કરતા કહ્યું કે, તેઓ ગઈકાલે પણ કોળી સમાજ સાથે હતા, આજે પણ છે અને ભવિષ્યમાં પણ મોખરે રહેશે. તેમણે ભારપૂર્વક જણાવ્યું કે હિરાભાઈ, પરસોતમભાઈ કે કુંવરજીભાઈ કોળી સમાજના નેતા છે અને રહેશે, તેમાં કોઈ બદલાવ આવશે નહીં.
પ્રવિણ કોળીએ કોળી સમાજની છબી ખરાબ કરવાના ઈરાદાથી સોશિયલ મીડિયામાં પ્રચાર કરતા લોકોને ચેતવણી આપી હતી. તેમણે વિશ્વાસ વ્યક્ત કર્યો કે હિરાભાઈએ કરેલા કાર્યોનો બદલો કોળી સમાજ ૨૦૨૭ની રાજુલા વિધાનસભા ચૂંટણીમાં રેકોર્ડ બ્રેક બહુમતી આપીને આપશે.
