અહેવાલ – અલ્પેશ ડાભી ભાવનગર
ભાવનગર: શહેરના નીલમબાગ પોલીસ સ્ટેશન વિસ્તારમાં લોકલ ક્રાઈમ બ્રાન્ચ (LCB)ની ટીમે મોટી સફળતા મેળવી છે. પોલીસને મળેલી ચોક્કસ બાતમીના આધારે નકલી નોટનું નેટવર્ક ચલાવતા એક શખ્સને ઝડપી પાડીને બનાવટી ચલણી નોટોનો મોટો જથ્થો કબજે કરવામાં આવ્યો છે.
ભાવનગર LCBની ટીમ જ્યારે પેટ્રોલિંગમાં હતી, ત્યારે બાતમી મળી હતી કે એક શખ્સ ડુપ્લીકેટ નોટો વટાવવા માટે શહેરમાં ફરી રહ્યો છે. આ બાતમીના આધારે પોલીસે અલકા સિનેમા નજીક વોચ ગોઠવી હતી. તપાસ દરમિયાન શંકાસ્પદ હાલતમાં મળી આવેલા એક શખ્સની તલાશી લેતા તેની પાસેથી ₹૨૦૦ના દરની બનાવટી નોટો મળી આવી હતી.
નકલી નોટો: ₹૨૦૦ના દરની કુલ ૩૪૩ નંગ નોટો.કુલ કિંમત: ₹૬૮,૬૦૦ની (કુલ મુદ્દામાલ ₹૫૫,૮૦૦ ગણવામાં આવ્યો છે), પોલીસે એક આરોપીની સ્થળ પરથી ધરપકડ કરી છે.
ઝડપાયેલો શખ્સ સિહોરના રાજપરા વિસ્તારનો રહેવાસી અજય ઉર્ફે ઘુઘો પોપટભાઈ બુધેલીયા હોવાનું સામે આવ્યું છે. પોલીસની પ્રાથમિક પૂછપરછમાં આ નકલી નોટોના તાર અમદાવાદ સુધી જોડાયેલા હોવાનું ખુલ્યું છે.આ કેસની તપાસમાં અમદાવાદના રહેવાસી ચિંતનભાઈ અનિલભાઈ કનોજીયાનું નામ ખુલતા ખળભળાટ મચી ગયો છે. ભાવનગર પોલીસે આ મુખ્ય સૂત્રધાર ગણાતા શખ્સને ઝડપી પાડવા માટે ચક્રો ગતિમાન કર્યા છે. આ નકલી નોટો ક્યાં છાપવામાં આવી હતી અને અન્ય કોણ કોણ આ રેકેટમાં સામેલ છે, તે દિશામાં નીલમબાગ પોલીસ સ્ટેશનમાં ગુનો નોંધી આગળની કાયદેસરની કાર્યવાહી હાથ ધરવામાં આવી છે.
