ઘરેલૂ શેરબજાર વૈશ્વિક રાહે ગુરુવારે નીચે ગેપમાં ખુલ્યું હતું. આજે સવારે ભારે વેચવાલીથી બીએસઈ સેન્સેક્સ 200 પોઈન્ટ્સ ઘટીને ટ્રેડ થઈ રહ્યો હતો જ્યારે નેશનલ સ્ટોક એક્સચેંજનો નિફ્ટી 19400ની નીચે ટ્રેડ થઈ રહ્યો હતો. આજે સવારે અદાણી પોર્ટના શેર 1.37% વધીને ટ્રેડ થઈ રહ્યા હતા.
ઘરઆંગણે ફુગાવાના દરમાં વૃદ્ધિ અને વૈશ્વિક અનિશ્ચિતતાઓને પગલે શેરબજારમાં દબાણ જોવા મળી રહ્યું છે. યૂએસ ફેડ વ્યાજદર અંગે આક્રમક અભિગમ અપનાવે તેવી આશંકાથી અમેરિકાના બજારોમાં ફફડાટ ફેલાયો છે. અમેરિકાના બજારો બુધવારે રેડ ઝોનમાં બંધ રહ્યા હતા અને તેને પગલે ગુરુવારે સવારે એશિયાના અન્ય બજારોમાં પણ મંદી જોવા મળી હતી.
આજે સવારે 9.40 વાગ્યે BSE સેન્સેક્સ 230.27 પોઈન્ટ્સ અથવા 0.35 ટકાના ઘટાડા સાથે 65309.15 પોઈન્ટ્સની સપાટીએ ટ્રેડ થઈ રહ્યો હતો જ્યારે નેશનલ સ્ટોક એક્સચેંજનો નિફ્ટી 59.95 પોઈન્ટ્સ અથવા 0.31 ટકા ઘટીને 19405.05 પોઈન્ટ્સની સપાટીએ ટ્રેડ થઈ રહ્યો હતો.
